Eg skal vere ærleg med deg.
Kvar gong eg opnar dashbordet i nettbutikken min, kjenner eg det same. Ein liten klump i magen. Ein sekund der eg puster inn og tenkjer: kjem det nokon i dag?
Og ganske ofte er svaret nei.
-----
Eg starta Tittis Hjørne fordi eg trong ein stad å finne ro. Hekling hadde gitt meg noko tilbake i ei tid der mykje var vanskeleg – og eg ville dele det vidare. Det var heile tanken. Del det som gjer godt.
Det eg ikkje var budd på, var kor einsamt det kan vere å bygge noko frå grunnen. Å legge sjela si i eit produkt, fotografere det, skrive om det, legge det ut – og så berre… vente. Sjå på ein skjerm som ikkje gir noko tilbake.
«Det ligg mange tankar i eit godt spøt.»
Ei eldre dame eg møtte i arbeidet mitt sa det ein gong. Ho meinte at i handarbeidet har ein god tid til å tenke. Ho hadde rett. Og desse dagane tenkjer eg mykje på kvifor eg gjer dette, og om eg gjer det riktig.
Tala som ikkje lyg
Eg har brukt timar på å lage oppskrifter, fotografere, skrive produkttekstar, sette opp nyheitsbrev, lage kursmateriell. I tillegg har eg ein jobb som forskingssjukepleiar å skjøtte. Det er kveldane, helgane og dei stille stundene mellom.
Og når ein bestilling kjem – og dei kjem, berre ikkje så ofte som eg hadde håpa – er det ei glede som er heilt unik. Det er nokon der ute som såg det eg laga, og tenkte: dette vil eg ha.
Det er verdt mykje.
Kvifor fortel eg dette?
Fordi eg trur mange som følgjer meg kanskje ser ein polert versjon av noko som eigentleg er ganske rått og uferdig. Sosiale medium er ikkje heile sanninga. Tittis Hjørne er eit prosjekt under utvikling – og eg er ein person som lærer undervegs.
Eg er stolt av det eg har bygd. Eg er stolt av oppskriftene, av vesketypane, av måten eg har valt å bruke ein del av omsetnaden til å støtte Landsforeningen mot seksuelle overgrep. Det betyr noko. Det er ein del av kvifor eg held fram.
Men eg er ikkje ferdig. Langt ifrå. Og det er kanskje det finaste med akkurat no – alt er framleis mogleg.
Ei lita bøn
Viss du les dette og har kjøpt noko frå meg, eller lasta ned eit gratis mønster, eller berre teke deg tid til å sjå på det eg lagar – tusen takk. Det betyr meir enn du veit.
Og viss du kjenner nokon som likar hekling, handarbeid, eller berre treng eit fint lite hjørne av internett – del gjerne. Det er slik ein liten butikk veks. Ikkje med store reklamekampanjar, men med ekte menneske som fortel andre ekte menneske.
Det er det eg trur på. 💛
– Titti